12.02.2010 / 207 marta o`qilgan
Qashqadaryo viloyatidagi vaqtincha to`xtab turgan "Qarshi avtoboshbekati - Bo`lmas qishlog`i" avtobus yo`nalishi qayta tiklanib, aholiga sifatli va xavfsiz transport xizmati ko`rsatila boshlandi.
Mazkur yo`nalishda faoliyat ko`rsatish huquqini olish uchun o`tkazilgan tender tanlovida "Sharofiddin-Nurullo" xususiy firmasi g`olib chiqqan edi. Ayni paytda korxonaga qarashli "Isuzu" rusumli avtobuslar yo`lovchilarning uzog`ini yaqin qilishdek mas`uliyatli vazifani tender bitimida ko`zda tutilgan shartlarga muvofiq ado etmoqda.
Keyingi paytda Samarqand avtomobil zavodida ishlab chiqarilgan qulay va zamon talablariga mos "Isuzu" avtobuslari soni Qashqadaryo viloyatidagi boshqa yo`nalishlarda ham ko`paymoqda. Yaqinda "Qarshi avtoshohbekati - Nuriston" avtobus yo`nalishida ishlayotgan shunday avtobuslar safi yana ikkitaga boyidi. Ular mazkur yo`nalishda faoliyat ko`rsatish huquqiga ega bo`lgan "Nishon-132" MCHJ tomonidan xarid qilinib, yo`nalishga chiqarildi.
Shu o`rinda aytish kerakki, o`tgan yilda "Qishloq taraqqiyoti va farovonligi yili" Davlat dasturi doirasida viloyat hokimligi, O`zbekiston avtomobil va daryo transporti agentligining Qashqadaryo hududiy bo`limi hamda boshqa mutasaddi idoralar sa`y-harakati bilan viloyatda qishloq aholisiga xizmat ko`rsatuvchi sakkizta avtobus yo`nalishi tiklanib, ushbu yo`nalishlarda 18 ta yangi "Isuzu" rusumli avtobuslar qatnovi yo`lga qo`yilgan edi.
Bu boradagi ishlar 2010 yilda ham izchil davom ettiriladi. Jumladan, yilning birinchi choragining o`zida viloyatda yana to`rtta avtobus yo`nalishini ochish rejalashtirilgan.
O`zbekiston avtomobil va daryo transporti agentligi Axborot xizmati
